A European Christmas

A European Christmas (2024) ဒီတစ်ခါမှာလည်း မိသားစုနဲ့ပေါ့ပေါ့ပါးပါးကြည့်ရှုနိုင်မယ့် ၂၀၂၄ ခုနှစ်ထွက် A European Christmas ဆိုတဲ့ ခရစ်စမတ်အချစ်ဇာတ်လမ်းလေးတစ်ပုဒ်ကို တင်ဆက်ပေးချင်ပါတယ်။ တစ်ချိန်တစ်ခါက ခရစ်စမတ်ပေါက်ကားတစ်ကားနဲ့နာမည်ကြီးခဲ့တဲ့ ရုပ်ရှင်ဒါရိုက်တာအိုင်ဗီဟာ လက်ရှိမှာတော့ ထုတ်လုပ်သူအကြိုက် လူကြည့်များအောင် ရုပ်ရှင်ရိုက်နေရပါတယ်။ သူဆက်ရိုက်တဲ့ကားတိုင်းဝေဖန်ခံရပြီး တဖြည်းဖြည်းနာမည်ကျလာတဲ့ အိုင်ဗီဟာ ထုတ်လုပ်သူအကြိုက်ရုပ်ရှင်ထပ်မရိုက်ပေးနိုင်ရင် သူ့အိပ်မက်ဖြစ်တဲ့ ဒါရိုက်တာအလုပ်ကို စွန့်လွှတ်ရဖို့ဖြစ်လာပါတယ်။ လူကြည့်များမယ့်ဇာတ်လမ်းအိုင်ဒီယာကိုစဥ်းစားနေတုန်း သူအောင်မြင်ခဲ့တဲ့ရုပ်ရှင်မှာပါဝင်ခဲ့တဲ့ ခေါင်းဆောင်မင်းသားဟန်တာကို ပြန်ခေါ်ရိုက်နိုင်ရင် လူကြိုက်များမှာပဲလို့ စိတ်ကူးမိသွားပါတယ်။ ဒီလိုနဲ့ မင်းသားဟောင်းဟန်တာရှိတဲ့ ဆားဘီးယားကိုလိုက်သွားရင်း ဆားဘီးယန်းအခြေပြုခရစ်စမတ်ရုပ်ရှင်ရိုက်ကူးဖို့ အိုင်ဒီယာရသွားခဲ့တယ်။ အိုင်ဗီနဲ့ဟန်တာတို့နှစ်ယောက် ဆားဘီးယန်းယဥ်ကျေးမှုထုံးတမ်းတွေ အတူလေ့လာရင်း သံယောဇဥ်တွေနက်ရှိုင်းလာခဲ့ပါတယ်။ အိုင်ဗီတစ်ယောက် ထုတ်လုပ်သူတွေရဲ့ဖိအားအောက်မှာ ဇာတ်လမ်းကောင်းတစ်ပုဒ်ဖန်တီးနိုင်ပါ့မလား ။ ဟန်တာကိုလည်း သူ့ရုပ်ရှင်မှာပါအောင် နားချနိုင်မှာလား။ အလွဲတွေကြားမှာ နှစ်ယောက်သားခံစားချက်တွေကို ဝန်ခံသွားကြပါ့မလားဆိုတာ စိတ်လှုပ်ရှားဖွယ်ကြည့်ရှုရမှာဖြစ်ပါတယ်။ ဒါ့အပြင် ဆားဘီးယားရဲ့ ယဥ်ကျေးမှုရာဇဝင်နဲ့ ရင်သပ်ရှုမောဖွယ်ရှုခင်းအလှတွေကို မျက်စိပသာဒဖြစ်ဖွယ် ကြည့်ရှုခံစားရမှာပါ။ ရုပ်ရှင်ဒါရိုက်တာအိုင်ဗီအဖြစ် ကက်ပရစ်ဘောရက်နဲ့ မင်းသားနေရာမှာဖစ်လစ်ဘွိုက်တို့က အသီးသီးပါဝင်သရုပ်ဆောင်ထားကြပါတယ်။